जारी दाहाल-नेपाल समूहको केन्द्रीय कमिटी बैठक
काठमाडौं । नेपाल कम्युनिष्ट पार्टी (नेकपा)को दाहाल-नेपाल समूहको केन्द्रीय कमिटी बैठक सुरू भएको छ ।
बबरमहलस्थित एक पार्टी प्यालेसमा जारी केन्द्रीय कमिटी बैठकअघि स्थायी कमिटी बैठक पनि बसेको थियो । सो बैठकमा पार्टीको महासचिव, सचिवालय सदस्य हेरफेर तथा प्रतिनिधिसभा विघटन गर्ने प्रधानमन्त्री केपी ओलीको कदमविरूद्ध आन्दोलनका कार्यक्रम गर्ने विषयमा छलफल भएको एक नेताले जानकारी दिएका छन् ।
दाहाल-नेपाल समूहमा महासचिवको आकांक्षीमा पाँच जनाको नाम चर्चामा छ । प्रवक्ता नारायणकाजी श्रेष्ठ स्थायी कमिटी सदस्यहरू सुरेन्द्र पाण्डे, भीम रावल, जनार्दन शर्मा र वर्षमान पुनमध्ये पाण्डेको विषयमा मोटामोटी सहमति बनेको एक नेताले बताए ।
गत आइतबार (५ पुसमा) प्रतिनिधिसभा विघटनपछि गत मंगलबारबाट नेकपाका दुई समूह (ओली र दाहाल नेपाल) बैठक बसिरहेका छन्।
प्रधानमन्त्री केपी शर्मा ओली समूहको पनि बालुवाटारमा केन्द्रीय कमिटी बैठक बसिरहेको छ । दुबै समूहले पार्टीमा वैधताको लडाइँ पनि सुरू गरेका छन् । आफू पार्टीको संस्थापन भएको जनाउन दिने गरी दुबै समूहले समानन्तर बैठक र निर्णय तीव्र पारेका छन् ।
अल्पमतमा परेको ओली समूहले ५५६ जना केन्द्रीय सदस्य थप्दै ११९९ सदस्यीय महाधिवेशन आयोजक समिति घोषणा गरेको जानकारी निर्वाचन आयोगलाई गराएको छ ।
दाहाल-नेपाल समूहले पनि ओलीलाई पार्टीको साधारण सदस्यसमेत नरहने गरी कारबाही गरेको तथा आफ्नो पक्षमा साविकको ४४१ केन्द्रीय सदस्यको बहुमत संख्या रहेको ब्यहोराको जानकारी निर्वाचन आयोगमा गराइसकेको छ ।
