किन प्रधानमन्त्रीले बोलाए संवैधानिक परिषद् बैठक ?
काठमाडौ।प्रधानमन्त्री केपी शर्मा ओलीले बुधबार साँझ संवैधानिक परिषद् बैठक बोलाएका छन् । राष्ट्रिय सभा अध्यक्ष गणेशप्रसाद तिमिल्सिनाको सचिवालयले बुधबार साँझ ५ बजे परिषद् बैठकमा उपस्थितिका लागि पत्र प्राप्त भएको जानकारी दिएको छ । परिषद्मा राष्ट्रिय सभा अध्यक्ष सदस्य हुन्छन् ।
प्रधानमन्त्री केपी शर्मा ओलीले गत पुस ५ मा प्रतिनिधि सभा विघटन गरी आगामी बैशाख १७ र २७ गते दुई चरणमा मध्यावधि निर्वाचनको घोषणा गरेपछि परिषद् बैठक पहिलो पटक बोलाएका हुन् । निर्वाचन घोषणा भएपछि सरकार कामचलाउ भइसकेको छ ।
विगतमा विभिन्न संवैधानिक निकायमा परिषद्ले गरेका नियुक्तिको सिफारिस विवादमा परेको बेला पुनः बैठक बोलाइएको हो । बैठकको एजेण्डा संवैधानिक निकायमा नियुक्ति र विविध भनिएको छ ।
प्रधानमन्त्री निवास बालुवाटारमा बस्ने बैठकमा प्रमुख प्रतिपक्षी दल नेपाली कांग्रेसका संसदीय दलका नेता शेरबहादुर देउवालाई भने सूचना पठाइएको छैन । प्रतिनिधि सभा विघटन गरेकाले देउवालाई सूचना नदिएको हुन सक्ने देउवाका स्वकीय सचिव भानु देउवाले बताए ।
प्रधानमन्त्री अध्यक्ष हुने परिषद्मा प्रतिनिधि सभामा प्रमुख प्रतिपक्षी दलको नेता, सभामुख, उपसभामुख, राष्ट्रिय सभा अध्यक्ष र प्रधानन्यायाधीश सदस्य हुन्छन् ।
