नेकपा विभाजित भएको छैन : नेता नेपाल
माघ,१९ काठमाडौ। नेकपा प्रचण्ड–नेपाल पक्षका अध्यक्ष माधव कुमार नेपालले नेकपा बिभाजित नभएको दाबी गरेका छन् । काठमाडौंमा सोमबार बसेको नेकपा प्रचण्ड–नेपाल पक्षको केन्द्रीय कमिटी बैठकमा अध्यक्ष नेपालले केन्द्रीय कमिटि र स्थायी कमिटीमा आफुहरुको बहुमत रहेकोले अर्को पक्ष चोटिएर गएको बताएका हुन् ।
नेकपा आफूहरुको भएको भन्दै कसैले आँखा लगाउन र औलो ठड्याउन नपाउने उनको भनाइ छ ।
नेपालले विधानको व्यवस्था बमोजिम नै पार्टीको बैठक बसेकाले निर्वाचन आयोगले आफुहरुलाई नै आधिकारीता दिनुपर्ने बताए । अध्यक्ष प्रधानमन्त्री केपी शर्मा ओली समूहसँग एक चौथाइ पनि केन्द्रीय सदस्य नभएको अवस्थामा नेकपाको चिन्हमा अरु कसैले दाबी गर्न नमिल्ने उनले बताए ।
नेपालले सरकार र पार्टीमा ओलीको एकाधिकार मानसिकता देखिएका कारण आफुहरुले कारबाही गरेको तर्क गरे ओलीले सहमति कार्यान्वयन नगरेको, गुटवादी सोच हाबी भएको, बैठक बोलाउन नमानेको र संघीयताविरोधी सोच राखेकै कारण अहिलेको अवस्था आएको नेपालले बताए । नेपालले संविधान मिचेर संसद बिघटन गरिएकाले नै नेकपामात्र नभई आम सर्वसाधारणहरु पनि आन्दोलीत हुन पुगेको उनको भनाइ छ ।
