थप ४१ अर्ब ६० करोडको धितोपत्र सूचीकृत
काठमाडौँ। चालु आर्थिक वर्षको तीन महिनामा विभिन्न प्रकृतिका गरी थप कुल ४१ अर्ब ६० करोड रुपैयाँ बराबरको धितोपत्र दोस्रो बजारमा कारोबारका लागि सूचीकृत भएका छन् ।
जसअनुसार ३३ अर्ब ३ करोड बराबरको ऋणपत्र, ३ अर्ब ५६ करोड बराबरको साधारण सेयर, २ अर्ब ५० करोड बराबरको सामुहिक लगानी कोष, १ अर्ब २८ करोड बराबरको बोनस सेयर र १ अर्ब २३ करोड बराबरको हकप्रद सेयर रहेको नेपाल स्टक एक्सचेञ्जले बताएको छ ।
सोही अवधिमा नेपाल धितोपत्र बोर्डले कुल ६ अर्ब २ करोड रुपैयाँ बराबरको धितोपत्र सार्वजनिक निष्काशनका लागि अनुमति दिएको छ । जसअनुसार ३ अर्ब बराबरको सामुहिक लगानी कोष, १ अर्ब ५८ करोड बराबरको साधारण सेयर, १ अर्ब २० करोड बराबरको डिबेन्चर र २४ करोड बराबरको हकप्रद सेयर रहेका छन् ।
गत असोजसम्म दोस्रो बजारमा सूचीकृत कम्पनीको संख्या २ सय २२ पुगेको थियो । सूचीकृत कम्पनीमध्ये १ सय ४५ बैंक तथा वित्तीय संस्था र बीमा कम्पनी छन् । ४१ जलविद्युत् कम्पनी, १९ उत्पादन तथा प्रशोधन उद्योग, ५ होटल, ५ लगानी कम्पनी, ४ व्यापारिक संस्था र ३ अन्य समूहका रहेका छन् । २०७७ असोजमा सूचीकृत कम्पनीहरूको संख्या २०९ थियो ।
सूचीकृत कम्पनीहरूमध्ये बैंक तथा वित्तीय संस्था र बीमा कम्पनीको धितोपत्र बजार पुँजीकरण हिस्सा ७०.७ % छ । यस्तै, जलविद्युत कम्पनीको हिस्सा ८.६ %, लगानी कम्पनीको ७.१ %, उत्पादन तथा प्रशोधन उद्योगको हिस्सा ४.१ %, होटलको हिस्सा १.४ %, व्यापारिक संस्थाको हिस्सा ०.५ % तथा अन्य समूहका कम्पनीहरुको हिस्सा ७.६ % छ ।
