आज नागपञ्चमी, घर घरमा नागको पुजागरि मनाइदै
काठमाडौं । श्रावण शुक्ल पञ्चमीका दिन प्रत्येक वर्ष मनाइने नागपंचमी आज परम्पराअनुसार घर घरमा नागको पूजा गरी मनाइँदै छ ।
हिन्दु धर्मालम्बीहरुले साउन शुक्ल पञ्चमीका दिन हरेक वर्ष नागपञ्चमी मनाउँछन् । परम्पराकाअनुसार नागपञ्चमीका दिन घरको मूलढोकामा नागको तस्बिर टाँसेर पुजाअर्चना गरी मनाउने गरिन्छ ।
घरको मूलढोकामा नागको तस्बिर टाँगेर पुजा गर्दा वर्षभरि घरमा नाग, सर्प, बिच्छीलगायतका जीवले दुःख नदिने जनविश्वास छ । साथै अग्नि, मेघ र चट्याङको भयबाट पनि बच्न सकिन्छ भन्ने धार्मिक विश्वास रहिआएको छ ।
नागका बाह्र नाम भए पनि आठ कूलका आठ वटा नागको पूजा गर्ने वैदिक सनातनकालदेखिको परम्परा रहि आएको छ ।
अनन्त, वासुकी, पद्म, महापद्म, तक्षक, कुलीर, कर्कट र शंख गरी आठ नागलाई आजको दिन ब्राह्मण पुरोहितबाट पूजाआजा गरी घरको ढोकामाथि टाँसिन्छ । भने ब्राह्मण उपस्थित हुन नसकेमा स्वयं घरका अग्रजले पनि पुजा गरि घरको ढोकामा समेत नागको फोटो सजाई पुजा गरिन्छ । आजको दिन घरमा नाग टाँसेपछि खेतबारीमा खनजोत नगर्ने र नाग, सर्प लगायतका घिस्रने जनावरलाई मार्नु हुँदैन भन्ने मान्यता पनि रहि आएको छ ।
वैदिक मान्यताअनुसार नागलाई सर्पको राजा मानिन्छ । नागलाई पुजा गर्न गाईको दूध, अक्षता, दुबो, खीर र रोटी लगायतका परिकार चढाउने गरिन्छ । आज सबेरैदेखि नाग मन्दिरहरुमा विषेश पुजाआजा हुने र भिडभाड हुनेछ ।
